Алқап күнінде аграрлық саланы дамыту мәселелері сөз болды

10.05.2024, 14:38 gurk.kz

Осы аптаның сәрсенбісінде Ескелді ауданындағы «Хильниченко и К» сенім серіктестігіне қарасты қант қызылшасы егістігінің басында облыстық ауыл шаруашылығы басқармасының ұйымдастыруымен Алқап күні өтті. Алқап басында облыс әкімі Бейбіт Исабаевпен болған кездесуге Ескелді, Көксу, Қаратал, Ақсу аудандары мен Талдықорған қаласындағы шаруа қожалықтарының жетекшілері келді. Шаруалар аграрлық саланы дамытуға қатысты ұсыныс-пікірлерін жеткізіп, қаржылық институттардан жеңілдетілген несие алудағы кейбір қағазбастылық мәселелерін жеңілдету жайын қозғады. Жергілікті әкімдік, қаржылық институт өкілдері және шаруашылық жетекшілері осы тақырып төңірегінде үш жақты талқылау жасап, ортақ мәселелердің шешімі жайлы ойларын ортаға салды, - деп хабарлайды Жетісу облысы әкімінің баспасөз қызметі.

Кездесуде алдымен облыс әкімінің бірінші орынбасары Әлібек Жақанбаев облыс аумағындағы егіс науқанының барысы, тұқыммен, минералды тыңайтқышпен техникамен қамтамасыз ету деңгейі, МТС-тарды жаңарту, мемлекеттік қолдау шаралары туралы кеңінен айтып берді. Оның айтуынша, егіс алқабын әртараптандыру аясында дәнді дақылдар 10,5 мың гектарға, картоп 880 гектарға қысқарып, басымды дақылдардың егіс көлемі жалпы 18,1 мың гектарға ұлғаяды. Қазіргі уақытта 274,7 мың га немесе 69,8% жаздық дақылдар себілді. Шаруашылықтар 18,5 мың себу бірлік болатын қант қызылшасы тұқымымен қамтылды. Осы жылы қолданылатын элиталық тұқым үлесін 2,6%-ке жеткізу жоспарланған. Мәселен, өткен жылы облыста 350 мың тонна қант қызылшасы өңделсе, биыл бұл көрсеткішті 500 мың тоннаға жеткізу көзделіп отыр.

- Бүгінгі күні облыста 22,3 мың бірлік ауыл шаруашылығы техникалары тіркелген. Бірақ шынтуайына келгенде соның көпшілігінің тозығы жеткен. Сондықтан сіздерге, шаруа қожалықтарына, өздеріңіздегі тіркеліп тұрған техниканың жарамсызын есептен шығару керек. Биыл біз қызылша бағытында 8 сервистік дайындау орталығын құрып жатырмыз. Сепкіштерді аудандарға таратып бердік. Комбайндар күзгі жиын-терінге дейін әкелінеді. Жалпы саны 62 бірлік техника алу жоспарланып отыр, - деді Ә. Жақанбаев өз сөзінде. Сол сияқты су шаруашылығы нысандарын жаңғырту жобаларының барысы жайлы да айтып берді.

Осы жиында аграрлық салаға қолдау көрсететін қаржылық институттардың өкілдері жеңілдікті несиелер беру мен мемлекеттік бағдарламаларға қатысу шарттары туралы баяндады. Сол сияқты жеткізуші компаниялар өздері ұсынатын тыңайтқыштар мен биологиялық қоспалардың, жаңа ауыл шаруашылығы техникаларының тиімділігін, өнімділікті арттырудағы мүмкіндіктерін таныстырып, көрме ұйымдастырды.

Шаруашылық жетекшілері өздерін толғандырған көктемгі дала жұмыстарын қаржыландыру, жеңілдетілген несие алу үшін кепілдік қоюдың мән-жайы, аграрлық салада жаңа бизнес ашу мүмкіндіктері, бақ шаруашылығын, соның ішінде құлпынай өсіруді дамытуға қатысты қаржылық институттардың өкілдеріне сұрақтарын қойып, осы мәселелерге қатысты өз ұсыныстарын жеткізді.

Диқандармен тілдесу барысында облыс әкімі Бейбіт Исабаев:

- Тіршіліктің негізгі көзі ет, сүт, көкөніс пен жеміс десек, соның бәрінің өнімді болуы жермен тиімді жұмыс істей білуімізге тікелей байланысты. Мәселен, өткен жылы 325 мың гектар егіс алқабынан 3914 мың тоннадай дәнді дақыл жинадық. Бұл дәнді дақылдардың көлемі бойынша республикада 4-ші көрсеткіш. Яғни жер көлемі айтарлықтай үлкен болмаса да, одан жиналған өнім көлемі жағынан алғаш рет төрттіктің қатарынан көріндік. Бұл біріншіден, өлкеміздің топырағы құнарлы, суы бар, климатты қолайлы екенін білдірсе, екіншіден, өздеріңіздей шаруалардың агротехнологиялық шараларды дер кезінде жүргізіп, тынбай еңбектенуінің нәтижесі. Өткен жылы жүгеріні өткізу жағынан біршама қиындықтар туындады. Дегенмен бұл мәселені бір ретке келтірдік. Біз биыл егістікті әртараптандыру аясында жүгері алқабын азайтып, есесіне бүгінгі күні табысты болып отырған қант қызылшасының, майлы дақылдардың, мал азығының егістік аумағын ұлғайттық. Өнімнің шығымы жақсы болуына мемлекет барынша қолдау көрсетіп отыр. Биыл да қолдау шараларын жалғастырамыз. Осы басқосуда көтерген қаржылай қолдау процедураларын жеңілдету туралы ұсыныстарыңызды депутаттармен бірге тиісті орталық органдарға жеткізетін боламыз, - деді Б. Исабаев.

Еске салсақ, биыл ауыл шаруашылығы дақылдарының егіс көлемі 7,0 мың гектарға ұлғайтылып, 524,8 мың гектарды құрап отыр. Соның ішінде қант қызылшасын 11,5 мың гектарға сеуіп, 500 мың тонна өнім жинау жоспарланған.

Жетісу облысы әкімінің баспасөз қызметі.

Источник: Акимат области Жетісу

Подписывайтесь на наш Telegram канал, и будте в курсе всех важных событий, вот ссылка - https://t.me/gurkkz